KARUNGUT SARITAN NAMPUI BULAN
Pantun Cerita Lisan Suku Dayak Ngaju
1. Are ampun baribu ampun
Dengan kula kakare ketun
Bawi hatue sapire atun
Awang mahining tuntang manuntun.
2. Mangarang mahi je dia tau
Baya angat paham taharu
Taluh je jatun handak nahiu
Saritan uluh je katika helu.
3. Nahiu taluh je katika huran
Jadi usang bajaman-jaman
Barang gaib je dia gitan
Taluh je leteng ingalimpangan.
4. Sarita pandak je dia panjang
Dia inapas tuntang ingurang
Jete baterus tuntang batarang
Inyusun awi tukang pangarang.
5. Sarita isut handak nampara
mangat itah katawan rata
akan itah bakas tabela
Bara ngaju paluskan ngawa.
6. Maka sarita tuh salenga tege
Manumun pansanan je tambi bue
Tukang pangarang naladan jete
Mangat ngatawan je uluh are.
7. Atun saritan je uluh huran
Bagantung benteng danum Kahayan
Narantang panatau pehuk Barahan
Bawin Balanga takuluk amban.
8. Bawin Balanga takuluk amban
Sampalak batang danum Kahayan
Jatun tanding tuntang tampengan
Bagantung lewu je lawang rahan.
9. Bawi bahalap ampie palalau
Mangantung nyahae je bungas Jagau
Bawi balanga turus panatau
Pantas eka tahaseng nihau.
10. Bawi bahalap tarang batantu
Paham batarung sahapus lewu
Indahangluh bawi puna bakuwu
Ingalindung awi je bapa indu.
11. Saritan balun intan Kamala
Nyai Nampui aran inampa
Intan singah lawang salaka
Utus pihit petak Balanga.
12Metuh bawi ngaragan lawang
Saritae bilang ayun hakumbang
Bara ngaju manyampai tumbang
Nyamah maja pantai sangiang.
13. Katahin Nyai je Nampui Kambang
Ngaragan papan je karung lawang
Tatap dengan je jipen ayang
Akan irentah ndu tambing huang.
14. Kahatahanan tarung intan garinda
Ngaragan papan lawang salaka
Nambeleng kare Mantir kapala
Sampai maja labehun Jata.
15. Saritae bahalap je panjung-panjung
Kilau bukit jajalan gantung
Balasang riwut kambang panarung
Jete puna marusak itung.
16. Badai saritae ayun hakumbang
Sampai maja pantai Sangiang
Intan singah lewu hamparang
Jete manjadi karusak huang.
17. Kahalap ampie je malabien
Kilau dia bawin kalunen
Amun ihitung tuntang ireken
Bilang angat tau tarewen.
18. Bilang tau itah salaya
Nampayah lalangan intan Kamala
Kameluh busun anak Hatalla
Putir tarantang je bawin Jata.
19. Marayuh balau je kambang labehu
Nambeleng hampis je riwut garu
Balua papan je lawang Kuwu
Melai laut je Tumbang Nyatu.
20. Halenyut balai paseban Jata
Babalai kalang labehu penda
Ngajang tarung intan garinda
Balua papan lawang salaka.
21. Alem te bulan batarang pandang
Tiruh bakalis je Nampui Kambang
Salenga nupi habaruae layang
Hasundau dengan hatue bujang.
22. Uluh hatue paham bakena
Hayak ampie paham nyalaya
Pandahal jete hatuen Jata
Bara kalang labehu penda.
23. Hatuen Jata je jadi lampang
Bahapang bulau je pusun pinang
Palus narusan je karung lawang
Manyundau Nyai je Nampui Kambang.
24. Hatue palus mambuka suara
Iyuh andi itan Kamala
Kakam narusan Lawang salaka
Dengam handak pander sarita.
25. Atun huang je aku kakam
Puna handak kahinje dengam
Amun atun angat kasukam
Umba aku je beken alam.
26. Palus Nampui munduk manure
Mahining pander uluh hatue
Angat atei palus kapehe
Mitung taluh je kanih kate.
27. Nampui tumbah kakare auh
Matei lepah kariraman taluh
Nyamah ikau dumahkan hetuh
Mangguang aku dia sanunuh.
28. Are bewei panderluh bawi
Tumbah auh ujau Maliti
Aku dia pintar harati
Dia pandeng kapala hai.
29. Kapala tumbah kakare auh
Lalehan andi lalau kalutuh
Jakai aku kakam belum sanunuh
Dia aku dumahkan hetuh.
30. Nampui tumbah auh balemu
Manumbah pander je kayu lingu
Manukas dia atawae tau
Aku balaku tempu hanjulu.
31.Buhen aku balaku tempu
Mahining auh je bapa indu
Amun kuan je ewen tau
Harun tukas atun batantu.
32. Amun kalute je auh andi
Kakam handak paramisi buli
Ingat peteh je tuntang janji
Kauju kareh je aku haluli.
33. Nampui misik palus tarewen
Nampayah jatun kalunen
Ayang batiruh dia laluen
Nampui manangis je siden-siden.
34. Amun mitung kanyasal angat
Metuh batiruh atun hapakat
Sana misik bereng kabuat
jete manjadi atei babehat.
35. Nampui nampayah sagitae-gitae
Kurus tawas je tanjang tangae
Sahining-hining pander saritae
Angat atun hapakat dengae.
36. Nampui mangantung kapehen atei
Gila kilau buah karuhei
Andau hanjewu nyangka halemei
Batang danum inggare sungei.
37. Amun nantumba angat kagiri
Tiruk itung je Nampui Nyai
Kelehmun palus je taluh masi
Dia layang kakare janji.
38. Amun janji hayang banaya
Sayang pander anak Kapala
Kelehku matei dia baramana
Sapala jatun sewut sarita.
39. Kapehen atei je sama sadang
Auh saritan je Nampui Kambang
Palus ie marentah ayang
Bapa dan indue cagar ingguang.
40. Sana andau jadi balawa
Nampui marentah Kambang Kananga
Manduan indue je tung bapa
Taharu handak pander sarita.
41. Ayang haguet dengan bahimat
Mimbit peteh ije babehat
Jalanan baliyas je tuntang capat
Nampui melai baya kabuat.
42. Ayang haguet manajung jalan
Akan tana tintun tujuan
Dengan bapae palus insanan
Jalanan ewen kilau manduan.
43. Kira-kira je pukul telu
Indu bapae bulikan lewu
Nampui mansanan je tutu-tutu
Ampin kare taluh pahuru.
44. Auh insanan terus batarang
Kuan saritan je nampui Kambang
Metuhku melai ngaragan lawang
Tiruh bakalis hambaruangku layang.
45. Kalunen puna atun manyupa
Nampayah ampie paham bekena
Nanggare arep hatuen Jata
Bara kalang labehu penda.
